ابو خضر السلمان قرية سلمة/ يافا

تاريخ 14 آذار، 2008

ابو خضر السلمان

قرية سلمة/ يافا

العمر: عشرين سنة يوم النكبة




كنت اشتغل بالبيارات بسلمة، كنا قريبين كتير من تل ابيب، بالكتير ستة كيلو بينا وبين يافا، كانت العلاقات بيننا وبين اليهود منيحة، بعدين صارو يبنو بتل ابيب ويستعمرو الاراضي، مكانش اسمها تل ابيب، كانت تل ابيب جزء من شط يافا، كان بيننا وبين اليهود ارض صغيرة خالية.



التغير بالامور صار بعد ما اتخذو قرار التقسيم سنة ال 1947، صارت الاشتباكات بين اليهود والعرب، استمرت بسبب انه الانجليز كانو بدهم ينسحبو من فلسطين ب 14 ايار،



قعدنا في حالة دفاع قوي مدة خمس اشهر، وكنا صامدين في قرانا طول الفترة من يوم قرار التقسيم بتشرين الثاني 1947 حتى ربيع ال 1948، بعدها اتغيرت الامور، صار عندهم سلاح اكتر وافضل اليهود، واحنا ما عنا الا البواريد، هما صار عندهم المورتر، بشهر اربعة سقطت يافا.



اليهود ضربو القري الفلسطينية المجاورة النا، وخشو على هاي القرى وعملو الفظايع تاعتهم، احنا طلعنا مشي، اليهود ما سكرو طريق الخروج من القرية وانما سكرو الطرق الفرعية، احنا طلعنا من سلمة ب 17/4/1948، طلعنا بموسم البرتكان، اشتغلنا شهر بالبرتكان قبل ما نهاجر من سلمه، البلد تاعتنا كانت بعيده عن الضفة الغربية، عشان هيك كانت صعبة علينا نرجع بالتهريب عالبلد عشان نلقط البرتكان.



اول اشي وصلنا لقرية صرفند، يعني على حدود قرار التقسيم، بعديها اليهود احتلو صرفند اللي خارج حدودهم المفروض تكون، بعديها هربنا على اللد، وصارت مأساة اللد واتهجرت اللد، قعدنا بس يومين باللد، وتاني يوم بالسماعة اسمعناهم يقولو اخرجو من البلد فوراً، وضلينا نمشي نمشي عالجبال، في ناس كتير عالطريق ماتو، وكانت كتير شوب، ما كانو يسمحولنا اليهود يومها انه نمشي عالشارع الرئيسي عشان هيك خلونا نمشي عالجبال، وبعدها مشينا برحلة العزاب من بلد لبلد.



انا رحت ازور يافا بعد النكسة، مش خايف اشوف سلمة، بس ما سنحت فرصة اني اوصل سلمة، سلمه جاي هلأ بقلب تل ابيب، بس اصحابي اللي زاروا سلمه قالولي انه سلمه مش موجوده عالخارطه هلأ وصارت حي من احياء مدينة تل ابيب.
http://www.palestineremembered.com/Jaffa/Salama/Story8989.html